کابل ـــ د جون د ۱۲مې، د ماشومانو د کار پر ضد د نړیوالې ورځې په مناسبت، د افغانستان د ښځو د راویښېدو مؤسسه (AOWA) د ماشومانو پر حقونو، په ځانګړې توګه د زده کړې، خوندیتوب، روغتیا او باعزته ژوند پر حق ټینګار کوي او د ماشومانو د سختو کارونو او اقتصادي استثمار پر وړاندې د لا زیاتو هڅو غوښتنه کوي.
ماشومان د هرې ټولنې ارزښتمنه پانګه او د هېواد د راتلونکي جوړوونکي دي. د ماشومتوب دوره باید د زده کړې، ودې، لوبو، پوهې ترلاسه کولو او د استعدادونو د غوړېدو وخت وي؛ خو له بده مرغه، د نړۍ په کچه میلیونونه ماشومان او په افغانستان کې هم ګڼ شمېر ماشومان د فقر، اقتصادي ستونزو، بېځایه کېدو، بشري بحرانونو او ټولنیزو محدودیتونو له امله اړ کېږي چې داسې کارونه ترسره کړي چې د هغوی روغتیا، هوساینه او راتلونکی له ګواښ سره مخ کوي.
د ماشومانو کار نه یوازې دا چې هغوی له زده کړې او د پرمختګ له فرصتونو محروموي، بلکې د فقر، نابرابرۍ او ټولنیزو ستونزو د دوام سبب هم ګرځي. هغه ماشومان چې له زده کړو پاتې کېږي او په سختو کاري شرایطو کې ژوند کوي، تر نورو ډېر د ناوړه ګټې اخیستنې، تاوتریخوالي، محرومیت او رواني او فزیکي ستونزو له خطر سره مخ وي.
افغانستان په وروستیو کلونو کې له پراخو اقتصادي ستونزو، د معیشتي فرصتونو له کمښت، طبیعي پېښو او بشري بحرانونو سره مخ شوی دی. دغو شرایطو پر کورنیو فشارونه زیات کړي او په ځینو مواردو کې یې ماشومان د کار بازار ته اړ کړي دي. د ماشومانو د کار مخنیوی د هغو اصلي لاملونو، په ځانګړې توګه فقر، بېکاري، له زده کړو محرومیت او د ټولنیزو ملاتړونو کمښت ته جدي پاملرنې ته اړتیا لري.
په اسلامي لارښوونو کې هم د انساني کرامت، د ماشومانو د ساتنې او د هغوی د حقونو د تأمین پر اهمیت ټینګار شوی دی. اسلام ماشومان الهي امانت ګڼي او ټولنه د هغوی د ساتنې، روزنې او سالمې ودې لپاره مسؤله بولي.
د افغانستان د ښځو د راویښېدو مؤسسه (AOWA) باور لري چې پر زده کړو پانګونه، د زیانمنو کورنیو ملاتړ، د معیشتي فرصتونو رامنځته کول او د ماشومانو د حقونو تأمین د ماشومانو د کار د کمولو او د راتلونکو نسلونو لپاره د غوره راتلونکي د جوړولو له مهمو لارو څخه دي.
د ماشومانو د کار پر ضد د نړیوالې ورځې په مناسبت، د AOWA مؤسسه له مسؤلو ادارو، ملي او نړیوالو سازمانونو، د ټولنې له مشرانو، کورنیو او ټولو هېوادوالو څخه غوښتنه کوي چې د ماشومانو د حقونو د ساتنې، د زده کړو د فرصتونو د پراختیا او د ټولو ماشومانو لپاره د خوندي او ملاتړي چاپېریال د رامنځته کولو په برخه کې لا زیاتې همکارۍ او هڅې وکړي.
هر ماشوم حق لري چې زده کړه وکړي، وده وکړي او روښانه راتلونکی ولري؛ نه دا چې خپل ماشومتوب په سختو او جبري کارونو کې له لاسه ورکړي.
د افغانستان د ښځو د راویښېدو مؤسسه
Afghanistan Organization Women Arise (AOWA)
